தூத்துக்குடி: கோவில்பட்டியில் பாரதிய ஜனதா கட்சியின் மாற்றத்துக்கான மாநாடு நேற்றிரவு நடைபெற்றது. வடக்கு மாவட்ட பாஜக தலைவர் வெங்கடேசன் சென்ன கேசவன் தலைமையில், நடைபெற்ற மாநாட்டில், பாஜக மாநில தலைவர் அண்ணாமலை, மாநில துணைத் தலைவர் சசிகலா புஷ்பா, மாநில பொதுச் செயலாளர் பொன் பாலகணபதி உள்ளிட்டவர்கள் கலந்து கொண்டனர்.
ஆயிரக்கணக்கானோர் கலந்து கொண்ட இந்த மாநாட்டில் பேசிய அவர், "தமிழகத்தில் பால் விலை, மின் கட்டணம், சொத்து வரி உயர்வு காரணங்களால் மகளிருக்கு மாதம் ரூ.3,500 கூடுதலாகச் செலவாகிறது. டாஸ்மாக் கடைகளை மூட வேண்டும் எனப் பெண்கள் கேட்கின்றனர்.
எதிர்க்கட்சியாக இருந்தபோது, டாஸ்மாக்கை மூட வேண்டும் என முதல்வர் ஸ்டாலின் கொடி பிடித்து போராட்டம் நடத்தினர். ஆனால், திமுக ஆட்சிக்கு வந்தபின்னர் தான் டாஸ்மாக் வருவாய் அதிகரித்துள்ளது என்றார். தமிழகத்தில் திமுக அமைச்சர்கள் மேடையில் பேசுவதைப் பார்க்கும் போது சமூக நீதி எங்கே இருக்கிறது.
மகாகவி பாரதிக்கு மத்திய அரசு வாரணாசியில் பனாரஸ் பல்கலைக்கழகத்தில் இருக்கை அமைத்துள்ளது. திமுக பாரதியாருக்கு என்ன மரியாதை கொடுத்துள்ளது?. தமிழகத்தில் 46 லட்சம் விவசாயிகளுக்கு ஆண்டுக்கு தலா ரூ.6 ஆயிரம் மத்திய அரசு வழங்குகிறது. ஆனால், தமிழக அரசு கொள்முதலின் போது ஒரு மூட்டை நெல்லுக்கு ரூ.60 முதல் ரூ.80 வரை கமிஷன் வாங்குகிறது. கப்பம் கட்டித்தான் ஆக வேண்டும் என்ற நிலையில் விவசாயிகள் உள்ளனர்.
சத்துணவில் அழுகிய முட்டை?
தமிழகத்தில் 2 ஆண்டுகளாக 6 மாவட்டங்களில் மதிய சத்துணவில் அழுகிய முட்டைகள் வழங்கப்பட்டுள்ளன. தமிழக அரசு முட்டைக்கு கமிஷன் வாங்காமல் ஏழை மாணவர்களுக்குத் தரமான முட்டை வழங்க வேண்டும்" என்று குற்றம்சாட்டினார்.
